Liña León - Asturias

A conexión en alta velocidade con Asturias, a través da Variante de Pajares, é unha das obras de enxeñaría máis complexas de Europa e o mundo: percorre o 80 % dos seus 50 km a través de 12 túneles que, xunto cos seus 10 viadutos, salvan a Cordilleira Cantábrica e o importante desnivel entre Asturias e a Meseta (500 m).

O túnel de Pajares (25 km) é o sétimo túnel ferroviario máis longo de Europa e a súa execución supuxo un desafío sen precedentes: até 5000 profesionais e cinco tuneladoras traballaron ao mesmo tempo na construción desta infraestrutura, que discorre a unha profundidade de 1 km.

A dobre vía electrificada conta co sistema de sinalización ferroviaria máis avanzado (ERTMS nivel 2) e está preparada para acadar unha velocidade máxima de circulación de 275 km/h.

O seu trazado recorta en 37 km a lonxitude do tramo actual polo Porto de Pajares -que data do século XIX- e presenta unha menor altitude e pendente, facilitando os traballos de mantemento invernal.

A Variante de Pajares é unha das liñas ferroviarias máis versátiles de España, xa que vai ser utilizada por trens de viaxeiros, rodando en ancho ibérico e, nun futuro, en estándar, e trens de mercadorías. Así mesmo, representa un salto sen precedentes nas conexións ferroviarias: os viaxeiros verán reducido en máis dunha hora o tempo de viaxe en tren entre Asturias e Madrid. E os trens de mercadorías poderán transportar até un 15 % máis de carga e ter máis lonxitude.

• 4000 millóns de investimento
• 50 km de lonxitude
• 12 túneles e 10 viadutos
• 5 tuneladoras tan altas como a Torre Eiffel e con 2000 tn cada unha traballaron simultaneamente na súa construción
• Entre 10 e 15 son os minutos nos que un tren atravesará o Túnel de Pajares
• O túnel bitubo de #Pajares é tan longo como a illa de Manhattan

Durante o seu deseño, planificación e construción implementáronse medidas de protección ambiental nunha contorna natural única, entre elas, restauracións medioambientais e de emboquilles dos túneles; xestión de residuos; uso de 3 km de cintas transportadoras para o traslado do material de escavación, reducindo notablemente o tráfico pesado de camións; a protección do río Huerna e convenios para a protección do oso pardo.

A conexión de Asturias dá un novo impulso ao desenvolvemento da rede ferroviaria de alta velocidade en España, que supera os 4000 km e se consolida como a maior de Europa e a segunda maior do mundo